БЕДЗЕНÆГ

тж. ДЕДЕНÆГ

Нарты кадджыты у æнæзæнæг лæг. Цæры кæмдæр быдыры. Фос æм бирæ уыд, уыдис æм ноджы кæфахсджытæ дæр. Иу бон куы уыди, уæд йæ кæфахсджытæ сæмбæлдысты лагъзыл æмæ йæ доны былмæ раппæрстой, мæнæ цы дзæбæх лагъз у, зæгъгæ. Бедзенæг-æлдары цур ын йæ сæр сæфтыдтой, æмæ дзы сывæллоны цъæхахст ссыди. Бедзенæг-æлдар æркасти лæппумæ æмæ ныццин кодта: «Уæ, йæ рынтæ йын бахæрон Хуыцауæн. Ай цæрынæй-хæрынмæ цæмæ бæллыдтæн, уый мын куы радта!» Стæй йæ усы тыхæвгъæды сбадын кодта, æмæ йын лæппуйы йæ фарсмæ цæвæрдтой. Бедзенæг-æлдар фидиуæгмæ фæдзырдта: «Дунетæн фехъусын кæ, Бедзенæгæн лæппу райгуырд, зæгъгæ». Лæппу та Уæллаг Нарты чызгæн райгуырд Дæллаг Нарты лæппуйæ. Æмæ Дæллаг Нарты цæсты цæмæй ма фæхудинаг уыдаиккой, уый тыххæй сын æй Сатана сæрмагонд арæзт лагъзы нывæрын кодта, стæй йæ фурды баппæрстой.

Бедзенæг хæларæй цæры Нартимæ, уæлдайдæр та – Сосланимæ. Йе ссарæггаг лæппуйыл дæр ын хъуамæ ном сæвæра Сослан, æмæ йыл цалынмæ фембæлы, уæдмæ лæппу цæры æмæ рæзы æнæномæй. Сæвæры йыл ном Бедзенæджы фырт чысыл Арæхдзау. Бедзенæгæн ис номæндзуринаг хæцæнгæрзтæ æмæ бæх. Кæй фæзæронд, уымæ гæсгæ сæ æвæрдæй дары ныккæнды, сæ уæлæ сын æрфæлдæхта, дыууæ галы кæй нæ фæразынц, ахæм къæй. Бæх у Уырызмæджы Хъулонæй тыхджындæр, йæ хæцæнгæрзтæ йын нæ уромынц Нарты рагъæнтæ.

Бедзенæг йе ссаргæ фыртимæ фурды был кæй цæры, кæсаджы куыст кæй кæнынц, уый тыххæй сыл худы Хызы фырт, дæ кæфы смаг калгæ ардæм цы ссыдтæ, зæгъгæ.

кæс «АРВЫ ДУАР»-Ы СÆРГÆНДТÆ